ᲛᲓᲒᲠᲐᲓᲝᲑᲘᲡ ᲞᲝᲚᲘᲢᲘᲙᲐ

ნიუ ვიჟენ უნივერსიტეტი აცნობიერებს საკუთარ როლს უკეთესი მომავლის უზრუნველყოფასა და მდგრადი განვითარების ხელშეწყობაში.

უნივერსიტეტისთვის მდგრადობა და მდგრადი განვითარება ნიშნავს ბრუნდტლანდის კომისიის მიერ (1987) მიღებულ განმარტებას – „მდგრადი განვითარება არის განვითარება, რომელიც გულისხმობს დღევანდელი მოთხოვნილებების დაკმაყოფილებას ისე, რომ საფრთხე არ შეექმნას მომავალი თაობების ინტერესებს“.

უნივერსიტეტი იღებს პასუხისმგებლობას გარემოსდაცვითი და სოციალური პასუხისმგებლობის კულტურის განვითარებასა და ეკონომიკური მდგრადობის ხელშეწყობაში.

მდგრადობის პრინციპების საქმიანობაში დანერგვით, უნივერსიტეტი მიზნად ისახავს შეამციროს მავნე ზეგავლენა გარემოზე და ხელი შეუწყოს საზოგადოების კეთილდღეობას. 

პოლიტიკა წარმოადგენს სახელმძღვანელო ჩარჩოს უნივერსიტეტის მიერ მდგრადობის ხელშეწყობისკენ მიმართული აქტივობებისათვის, ის გადაიხედება და შეიცვლება დროთა განმავლობაში, აქტუალური გამოწვევებისა და შესაძლებლობების კვალდაკვალ.

დოკუმენტი ასახავს უნივერსიტეტის პოლიტიკას კლიმატური ცვლილებების, რესურსების ამოწურვისა და სოციალური უთანასწორობის გამოწვევების საპასუხოდ.

უნივერსიტეტის მდგრადობის პოლიტიკა ეფუძნება შემდეგ ძირითად პრინციპებს:

• მდგრადობის ხელშეწყობა სწავლებით, კვლევითა და ინოვაციებით;

• გარემოს მდგრადობა და მდგრადი ოპერაციები;

• საზოგადოერივი ჩართულობა;

• სოციალური თანასწორობა და კეთილდღეობა.

პოლიტიკა შემუშავებულია უნივერსიტეტის სტრატეგიული განვითარებისა და ინტერნაციონალიზაციის კომიტეტის მიერ, საუნივერსიტეტო საზოგადოების ჩართულობით. მდგრადობა წარმოადგენს უნივერსიტეტის ერთ-ერთ სტრატეგიულ პრიორიტეტს, შესაბამისად, სტრატეგიული განვითარებისა და ინტერნაციონალიზაციის კომიტეტი აფასებს უნივერსიტეტის მდგრადობის პოლიტიკისა და პრაქტიკის იმპლემენტაციას და შეიმუშავებს რეკომენდაციებს შემდგომი განვითარებისთვის.